Балалармен ұшу

Қазақстан Республикасының бүкіл аумағында балаларды тасымалдаудың бірыңғай қағидалары белгіленген: ересек жолаушы өзімен бірге 2 жасқа дейінгі жеке орынсыз бір баланы тегін алып жүре алады. Егер жолаушымен 2 жасқа дейінгі бірден көп балалар жүрсе, онда оларға тариф ішінара төленіп, жеке орын ұсынылады.   

6 жастан 16 жасқа дейінгі кәмелетке толмаған жолаушылар ішкі және халықаралық рейстерде ересек адамдарсыз жалғыз саяхаттай алады. Балаларды тасымалдаушының бақылауымен ата-аналары (асырап алушылары, қамқоршылары) тасымалдауға жазбаша өтініш рәсімдегеннен кейін ғана тасымалдауға болады. 

Ересек адамсыз кәмелетке толмағандар "Қазақстан Республикасындағы Бала құқықтары туралы" 2002 жылғы 8 тамыздағы Қазақстан Республикасы Заңының 36-бабының 5-тармағына сәйкес түңгі сағат 23-тен таңғы 6-ға дейін тасымалдауға қабылданбайды.

6 жасқа дейінгі кәмелетке толмаған жолаушылар кәмелетке толған жолаушымен бірге ғана тасымалданады.

Егер Қазақстан Республикасының кәмелетке толмаған азаматы Қазақстан Республикасынан жалғыз шыққан жағдайда, оның паспортынан басқа өзімен бірге ата-анасының, асырап алушыларының, қорғаншыларының Қазақстан Республикасының кәмелетке толмаған азаматының шығу мерзімін және өзі баруға ниет білдірген мемлекетті (мемлекеттерді) көрсете отырып, шығуға нотариалды рәсімделген келісімі болуы қажет.